La luna mi osserva dal cielo

e i riflessi delle luci sull'acqua

che tante volte 

mi hanno fatto immaginare il mare

mi riportano nei miei sogni passati

quando affacciata alla finestra

respiravo l'aria di questa mia tristezza. 

 Gianna Caiazzo

1985

traduzione

Anema mia

te voglio mmesurà comm’a ll’antiche

te metto ‘ncopp’’o piatto ‘e na valanza

e all’atu lato ce appojo na bella piuma.

“A me ce miette?" Fa all’intrasatta ‘a piuma

“ E che te cride ‘e fà cu sta sciuscella?

Ccà p’aizà chesta mappata ‘e rrobba

nun t’abbastasse na carriola ‘e prete!”

“Ave raggione” tra me e me penzaje

 “St’anema mia, tra turmiente e affanne

è addeventata almeno nu quintale!

Mo sò guaglione e pesa ‘e sta manera

figurete si ‘a peso tra trent’anne!”

“He visto?” me dicette ‘a piuma lesta

“ce staje penzanno 'a coppa, he fatto buono.

‘A pise o nunn ’a pise a che te serve?

Te l’he ‘a purtà, fattenne na raggione!”

Gianna Caiazzo

5 settembre 2009

Te dico na parola chiatta chiatta

d’’a  lengua mia, cusuta su misura

te dico chella e nun ne cerco n’ata

pecchè è precisa chello c’aggia dì.

Nisciuna voce perbene e ‘mpernacchiata

‘e nu vocabbolario d’’o ttaliano

me pò servì pe te pittà ‘o penziero

ca m’aggio fatto dint’’a capa mia.

Putesse truvà ‘o termine cchiù bbello

‘o cchiù  moderno oppure ‘o cchiù sciscì

ma mo t’’o schiaffo c’’o napulitano

e meglio ‘e chesto nun ‘o può capi’!

Gianna Caiazzo

9 agosto 2mila9

Vulesse addeventà na poetessa

na penna fina, nu poco na Trilussa

vulesse nu ritratto comm’a SSaffo

c’’o foglio mmano e ‘a penna ‘mpont’’o musso.

Però m’accuntentasse ‘e chistu suonno:

quaccuno cammenanne tra cient’anne

truvanno na  poesia jettata ‘nterra

liggennela dicesse: Chesta è Gianna!

Gianna Caiazzo

29 giugno 2mila9

Granturco abbrustulito e ‘mericane

semmente, pistacchie, cicere ‘ntustate,

p’ accuntentà a mugliereta, ‘e ccriature

’o nonno ‘a nonna  e pure ‘e cainate

Nun ce sta pranzo dint’a sti quartiere

ca nun fernesce cu chistu capriccio

tra na resata e nu bicchiere ‘e vino

na chiacchierata  e na battuta ‘e spiccio

Mo se cuntratta cu chello ch’è avanzato

diece  semmente pe quatto ‘mericane

cchiù pe nu rito ca pe n’interesse

se fa ‘o baratto comm’a nu mercato

Nu pugno ‘e cicere cade dint’'o vino

 e llà rimmane fino a se spugnà

quanno sarranno tiennere a puntino

t’'e magne ‘a surze, senza mastecà .

Po’ chianu chiano ‘a chiacchiera se smorza

quacche resata ancora se ne va

 fernesce dint’a na muntagna ‘e scorze

chistu mumento ‘e convivialità.

Gianna Caiazzo

28 giugno 2mila9

Chell'ogna 'e luna c' 'a stelletella areto

me pare na parura 'e giujelliere

'a luna d' 'o mmetallo cchiù lucente

'a stelletella d' 'a cchiù preziosa preta.

Gianna Caiazzo

21 maggio 2mila9

Nun sò poeta nun songo nu scrittore

nunn'è nu nomme ca t'accarezza 'o core

ma sti pparole ca scorreno 'int'’e mmane

se fanno museca e volano luntano.

Gianna Caiazzo

3 maggio 2mila9

Uno 'e sti juorne me scrivo a fessobbucco

m'avoto e giro e 'o veco a tutte parte

vogl'i' cercanno tutta chella gente

c'aggio perduto tantu tiempo fa

M'aggia 'ntallià pur' i' nu paro d'ore

i' spuculianno dint'’e fatt'’e ll'ate

aggia 'nfizzà nu nomme dint'’o spazio

e aggia vedè 'a risposta ca me da

Voglio capì comme s'è  ffatto chillo

a chi cunosce chella tala perzona

quanta cumpagne tene 'a cumpagna mia

'e tutte cose me vogl'i' a 'ntricà

Aggia parià 'ncopp'’e bacheche 'e ll'ate

vaco scrivenno quatto fessarie

na resatella na parola 'e spiccio

pure 'e nuttate nce voglio passà

'Int'’o prufilo metto 'a fotografia

tutt'’a famiglia cu mugliera e figlie

pecchè chi 'a vede nun se fa illusione

songo ‘mpignato e nun se pò allargà

Nun me voglio sentì 'nferiore  a ll'ate

me votto dint'’o uebbo e statte bbuono

aggi' apparà na migliarata 'e ggente

e tutt'’e juorne me l'aggia i' a cuntà

Me voglio fà p'amice 'e meglie nomme

nun  me ne 'mporta si nunn 'e cunosco

'o nicessario pe mme è ca quann'’o ddico

'a tutte quante m'aggia fà mmirià

E nun fa niente si faticammo 'nzieme

si 'e 'ncontro tutt'’e juorne 'ncopp'’o posto

si a quaccheduno quanno 'o veco 'o scanzo

ma dint'’a fessobbucco nce adda stà

Stu grande parlamiento virtuale

è n'invenzione ca me piace assaje

parlà 'a vicino mo s'è fatto antico

i' sò moderno che nce pozzo fà?

Gianna Caiazzo

1 maggio 2mila9

Patatè stamme 'a ssentì

pecchè 'o ssaccio ca me siente

nun me fà recchie 'e mercante

a quatt'uocchie amma parlà

E vabbuò staje 'ndaffarato

ma nun t'aggio chiesto niente

sulamente na preghiera

nu minuto me l'he ‘a dà

Forse mo nunn'è 'o mumento

stanno cose cchiù ‘mportante

i' mo t''o 'ccummencio a dicere

po’ decide tu ch’ ê 'a fà.

Scanzame d’â ggente 'e niente

d’ ê mmeriuse e d’ ê ssanguette

'a chi fa na bella faccia

e s'avota a rusecà

Scanzame d’ ê sicciaiuole

ca t'asseccano 'int'all'osse

‘a chi pare muchiosurdo

ma è 'o peggio ca ce sta

dice ca sto esaggeranno

ch' ’iss’’a rimmanè tu sulo?               

tu accummience a ffà stu scarto

po’ vedimme chi ce 'a fa.

Gianna Caiazzo

28 aprile 2mila9

Se cagneno e se scagneno

Comm’a ddoje guardie  â reggia

se 'ncontrano, se scontrano

mo girano p''o llargo

marciano passo passo

se 'mpontano all'attenti

se passano 'a cunzegna

se mettono 'e rimpetto

mo fanno n’atu turno

'o giro se ripete

'a longa corre annanze

'a piccerella areto.

Gianna Caiazzo

17 aprile 2mila9

Te sto fittianno 'a quanno sì arrivato

cu stu vestito a ffiore e 'a nocca 'nganna

te sì piazzato dint'’o meglio posto

addò è sicuro ca sarrai guardato

E i' te guardo, mentre passo e spasso

nun te pozzo levà chist' uocchie 'a cuollo

'a tentazione è forte e me turmenta

'o desiderio cresce e nun me lassa

I' già te veco annuro 'int'a sti mmane

te sbatto forte primm'’e te fa mio

vurria sapè che t'annascunne dinto

'e tutto chesto po’ che mme rimmane?

Spero ca nun me daje na delusione

comm' hanno fatto ll'ate primm’'e te

tanti pprumesse, tanti bbelli pparole

ma po’ nun m'hanno dato nient'’e buono

Certo però, stavota nun ce casco

i' cerco 'e nun me fà tropp' illusione

Stavota overo nun m'aspetto niente

a cunte fatte sì sulo n'uovo 'e Pasca!

Gianna Caiazzo

6 aprile 2mila9

Nu paro 'e pennellate niro funno

Scriziat’'e janco 'ncopp'a nu foglio 'e cielo

cummoglie 'e suonne 'e nu munno d'uocchie

ancora chiuse dint’’o suonno d'’a sera

na sbavatura 'e russo saglie chiano

s'appoja 'ncopp'’e palazze e rompe 'o nniro

s'arrampeca addò 'e stelle ancora lùcene

'e stute a una a una e l'annasconne

'A luce a poco a ppoco allaga 'a notte

pazzèa cu 'e tinte c'ha 'mprestato ô mare

tutt’a nu tratto na vampata d'oro

s'appiccia 'int'’e feneste e abbruscia l'aria.

 Gianna Caiazzo

3 aprile 2009

Se dice c'ogne posto tene n'anema

na linfa ca le scorre 'int'’o turreno

'a forza 'e nu richiamo misterioso

c'ammalia comm'’o canto 'e na sirena

Nu ffuoco ca te marchia quanno nasci

na fiamma c'arde senza fà rummore

na cosa forte comm’a na catena

ca t'arravoglia fino a ca nun muore

Se chiamma Genio ma nunn è cumm'a fiaba

ccà nun 'mbruscin’'a lampada e cumpare

ma s'annasconne, se 'mpregna dint'’o core

nun sì padrone,ccà sì tu 'o schiavo!

Gianna Caiazzo

28 marzo 2mila9

Dicette 'a penna : "Aggia cagnà mestiere

me sento stanca, moscia, sfaticata

'a quanno è asciuta mmiezo sta tastiera

me pare ca me vò disoccupata.

Primma zumpavo allerta ogne minuto

'a nota, 'o cunto, 'a lettera, 'e llezzione

'a quanno hanno 'nventato sta curnuta

nun sò cchiù 'a stessa, sò ghiuta 'n depressione!

Dint'all' ufficio po’ nun ne parlammo

ero 'a padrona e t'’a cumannav'io

mo sto jettata tra matite e gomme

tutt'’a jurnata 'ncopp’'a scrivania

P'’e fatte tuoje però vuò ascì cu mme

sò stata zitta e te n'he apprufittato

quann’ è 'o mumento t'aggia fà vedè

saje che te dico? mo me sò seccata!"

Gianna Caiazzo

31 gennaio 2mila9

Dedicata ai bambini

delle guerre di tutti i tempi.

Uocchie sperdute

dint’’a pazzia d’’o munno

dint’’e mmane d’’e gruosse

c’accussì gruosse nun songhe

Uocchie stutate

dint’’a luce d’’o juorno

‘ncopp’’a strada d’’a vita

‘ncopp’’o suonno ‘e nu suonno

 Uocchie sgranate

dint’’o scuro d’’a notte

‘nfaccia ‘a faccia d’’a morte 

Uocchie…uocchie ‘nfuse

‘ncopp’’a miseria ‘e ll’ommo.

Gianna Caiazzo

14 gennaio 2mila9 

Embè i' nun capisco, tutte l’anne

pecchè t’aggia vedè a pecundrìa

stu brivido ‘int’’e rine fino abbascio

c’hai voglia a t’arrugnà ma nun te passa

Tra poco è mezanotte e me ne vaco

ma nun me spiego 'e llacreme ‘int’all’uocchie

te fa piacere? Te fa malincunìa?

pecchè stasera ‘o core nun risponne?

Sò sulo nummero ‘ncopp’’o calannario

Dicembre scritto ‘ncapo e 'o juorno 'a sotto

te faccio specie ‘o ssaccio, songo l’urdemo

ma ‘o tiempo, dint’all’anema, è tutt’uno!

Gianna Caiazzo

30 dicembre 2mila8

Na poesia longa longa, longa,

chiena 'e parole, longa, longa longa,

si me scervello m' ’a pozzo 'nventà

ma longa longa nun 'a saccio fà.

Ce aggio penzato ma nun ce riesco

nce metto 'e strofe 'a rima e quacche punto

me sforzo, si però me rendo conto

ca chistu broro nun se pò allungà.

Forse sarrà pecchè m'’e 'nvent’ 'e notte

cu ll'uocchie apierte dint'’a stanza 'o scuro

mo aggio capito pecchè 'e ffaccio corte

me piglia 'o suonno e po’ ll'aggia taglià!

Gianna Caiazzo

21 novembre 2mila8

Vint'anne 'nzieme a tte, vint'anne 'e vita

ma nun me pare ajere si m'avoto

invece 'e vveco a uno a uno 'e juorne

d'ammore, arraggio, malotiempo e sole

ma sempe 'nzieme, sempe ‘nnammurate

partì d'ajere, me pare nu peccato!

  Gianna Caiazzo

11 ottobre 2mila8

(dedicata a Vittorio)

Settembre,'a culla d''a frennesìa d''a staggione.

Gianna Caiazzo

21 settembre 2mila8