‘O spassatiempo.

 

Granone abbrustuluto e ‘mmericane

semmente, pistacchie, cicere ‘ntustate,

p’ accuntentà a mmugliereta, ê ccriature,

ô nonno, â nonna  e ppure ê cainate.

 

Nun ce sta pranzo dint’a ‘sti quartiere

ca nun fernesce cu cchistu capriccio,

‘nfra ‘na resata e ‘nu bicchiere ‘e vino

‘na chiacchierata  e ‘na battuta ‘e spiccio.

 

Mo se cuntratta cu cchello ch’è avanzato:

diece  semmente pe qquatto ‘mericane;

cchiù pe ‘nu rito ca pe ‘nu ‘nteresse

se fa ‘o bbaratto comm’a ‘nu mercato.

 

‘Nu pugno ‘e cicere cade dint’ ô vino

 e llà rummane fino a sse spugnà;

quanno sarranno tiennere a puntino

t’’e mmagne a ssurze, senza mastecà .

 

Po’ chianu chiano ‘a chiacchiera se smorza,

quacche rresata ancora se ne va,

 fernesce dint’a ‘na muntagna ‘e scorze

chistu mumento ‘e cunvivialità.

 

 

Gianna Caiazzo

28 giugno 2mila9

 

‘O spassatiempo.ultima modifica: 2009-08-20T17:31:00+02:00da dilloallautrice
Reposta per primo quest’articolo