‘A terra d”o ffuoco.

Nun te so’ mmamma, io?
E tu, tu me sî ffiglio, t’hê scurdato?
I’ songo chella terra addó sî nnato,
e mentre te criscevo m’hê traduto.

M‘hê ‘vvelenato ll’anema ‘nsilenzio,
m’hê miso ‘ncopp’ê cchiaie n’ata chiaia…
Nun m’abbastavano lacreme e tturmiente?
‘E ppene c’aggio avuto, nunn ‘e ssaje?

Nunn hê zucato, forze, ‘a chistu pietto?
Nunn hê araputo ll’uocchie ‘mbraccia a mme?
Tu m’hê vennuto pe ttrenta denare,
comme si nun facesse parte ‘e te.

Mo ‘a siente ‘chesta voce, ‘stu lamiento?
È ‘a voce ‘e chesta terra marturiata,
è ‘o chianto ‘e chesta mamma disperata
ca hê scanusciuto senza avé pietà.

 

Gianna Caiazzo
6 novembre 2mila13

‘A terra d”o ffuoco.ultima modifica: 2013-11-13T17:10:00+01:00da dilloallautrice
Reposta per primo quest’articolo