‘O càntaro e ‘arciulo.

‘Nu càntaro e n’arciulo,
saglienno p”a ‘Nfrascata,
‘nu juorno se scuntrajeno
pe ccaso mmiez’ â strata.
 
– Neh, guarda a cchistu càntaro!-
dicette ll’ uno a ll’ ato.
-Ma comme, io songo ‘arciulo
e mme daje ‘sta vuttata?-
 
– Scusate, Don  Arciulo,
nun ll’ aggio fatto apposta,
ma pe scanzà ‘a carretta
so’ gghiuto â parta vosta –
 
– E stateve cchiù attiento,
ca ccà simmo signure,
nun simmo abbituate
a ffà bbrutti ffigure.-
 
– E tt’aggio ditto scusa
che vvaje truvanno cchiù?
Mme pare ca p”a strata
nce stisse sulo tu! –
 
– Ma io songo n’arciulo,
so’ ffine e ddelicato…
tu me putive rompere
cu cchella ddio ‘e vuttata! –
 
 – E gghià nun v’arraggiate,
ca nunn è ppena ‘e morte…
comme ve ll’aggia dicere
ca nun me ne so’ accorto?
 
So’ ccose ca succedeno… –
– E ‘nziste, ‘stu cafone! –
– Signó mo m’hê sfasteriato…-
– Mmesurate ‘e pparole!
 
Ma tu vide a ‘stu zimmaro,
se mmereta ‘e mmazzate.
Ringrazia ca so’ arciulo…
‘Stu piezzo ‘e scustumato! –
 
– Ma quale arciulo e arciulo…
ma tu te sî gguardato?
Tu sî ssulo ‘nu càntaro,

‘nu càntaro e nient’ato. –

Gianna Caiazzo
31 gennaio 2mila14
 
 
‘O càntaro e ‘arciulo.ultima modifica: 2014-02-01T19:50:22+00:00da dilloallautrice
Reposta per primo quest’articolo

Lascia un commento

Il tuo indirizzo email non verrà pubblicato ma sarà visibile all'autore del blog.

*