Archivi giornalieri: 20 agosto 2009

‘A penna.

Pubblicato il da

Dicette ‘a penna: “Aggia cagnà mestiere

me sento stanca, moscia, sfaticata

‘a quanno è asciuta ‘mmiezo ‘sta tastiera

me pare ca me vo’ dissuccupata.

 

Primma zumpavo allerta ogne minuto

‘a nota, ‘o cunto, ‘a lettera, ‘e llezzione

‘a quanno hanno ‘nventato ‘sta curnuta

nun so’ cchiù ‘a stessa, so’ ghiuta ‘ndepressione!

 

Dint’all’ufficio po nun ne parlammo

ero ‘a patrona e t’’a cummannav’io

mo sto’ gghittata tra làppese e gomme

tutt’a jurnata ‘ncopp’ â scrivania.

 

P’ ’e fatte tuoje però vuò ascì cu mme

so’ stata zitta e te n’ hê apprufittato

quann’ è ‘o mumento t’aggia fa vedè

Saje che te dico? Mo me so’ sseccata! “

 

 

 

Gianna Caiazzo

31 gennaio 2mila9

Uocchie dint’â guerra.

Pubblicato il da

Uocchie sperdute

dint’â pazzia d’’o munno

dint’ê mmane d’’e gruosse

c’accussì gruosse nun songhe.

 

Uocchie stutate

dint’â luce d’’o juorno

‘ncopp’â  strada d’’a vita

‘ncopp’ ô suonno ‘e ‘nu suonno.

 Uocchie sgranate

dint’ô scuro d’’a notte

‘nfaccia â faccia d’’a morte.

Uocchie…uocchie ‘nfuse

‘ncopp’ â miseria ‘e ll’ommo.

 

Gianna Caiazzo

14 gennaio 2mila9 

 

Dedicata ai bambini delle guerre di tutti i tempi.

‘O 31 ‘e Dicembre.

Pubblicato il da

Embè, i’ nun capisco tutte ll’anne

pecchè t’aggia vedè a ppucundrìa,

stu brivedo ‘int’ê rine fino abbascio

c’haje voglia a tt’arrugnà ma nun te passa.

 

‘Nfra poco è mmezanotte e mme ne vaco,

ma nun me spiego ‘e llacreme ‘int’all’uocchie:

Te fa piacere? Te fa malincunìa?

Pecchè stasera ‘o core nun risponne?

 

So’ ssulo nummero ‘ncopp’ ô calannario,

Dicembre scritto ‘ncapa e ‘o juorno ‘a sotto;

te faccio specie ‘o ssaccio, songo l’urdemo

ma ‘o tiempo, dint’all’anema, è ttutt’uno!

 

Gianna Caiazzo

30 dicembre 2mila8

 

Longa longa.

Pubblicato il da

‘Na poesia longa longa, longa,

chiena ‘e parole, longa, longa longa,

si me scervello m’ ’a pozzo ‘nventà

ma longa longa nunn ‘a saccio fà.

 

Ce aggio penzato ma nun ce riesco

nce metto ‘e strofe ‘a rima e quacche punto

me sforzo, sì, però me rendo conto

ca chistu bbroro nun se pò allungà.

 

Forze sarrà pecchè m’ ’e ‘nvent’ ‘e notte

cu ll’uocchie apierte dint’â stanza ô scuro

mo aggio capito pecchè ‘e ffaccio corte:

me piglia ‘o suonno e ppo ll’aggia taglià!

 

 

Gianna Caiazzo

21 novembre 2mila8

 

Nun me pare ajere.

Pubblicato il da

Vint’anne ‘nzieme a te, vint’anne ‘e vita

ma nun me pare ajere si m’avoto

 

invece ‘e vveco a uno a uno ‘e juorne

d’ammore, arraggia, malo tiempo e sole

 

ma sempe ‘nzieme, sempe ‘nnammurate

partì d’ajere me pare nu peccato.

 

 

Gianna Caiazzo

11 ottobre 2mila8

(dedicata a Vittorio)

 

San Gennaro ha fatto ‘o miràculo!

Pubblicato il da

 

 

 

San Gennaro ha fatto ‘o ssuojo, mo me pozzo arrepusà,

mo me sento cchiù tranquillo, quassì cosa aggi’ affruntà;

 

quatto passe ‘int’ô bburdello, mo me pozzo arrecrià.

‘Nu curteo ‘e dissuccupate? E va bbuò facit’ ‘e ffà!

 

Tutt’ ‘o traffico bloccato? Ma che vv’arraggiate a ffà?

Si mo chiove e vv’allagate? N’arremiedio nce starrà!

 

San Gennaro nce ha penzato, mo sî ttu ca t’ hê arrangià!

 

Gianna Caiazzo

19 settembre 2mila8

‘O lavoro mobbilita ll’uomo.

Pubblicato il da

 

‘O lavoro me fa male

ll’aggio ditto e vv’’o rripeto

si nun fosse p’’a campata

mommò me tirasse areto.

Haje a che ffà cu mille cape

chi ‘a vo’ cotta e chi ‘a vo’ crura

tutt’’e juorne ‘a stessa storia

tutt’’e juorne ‘na jattùra.

Si acchiappasse dint’ê mmane

chi ha ‘nventato ‘sta cundanna

lle dicesse dint’a ll’uocchie

chello ca me sento ‘nganna.

Neh, titò, te riende conto

‘e che t’hê fidato ‘e fà?

S’era faticà pe vvivere

mo campammo a ffaticà!

 

Gianna Caiazzo

11 ottobre 2mila8

 

‘A pizza

Pubblicato il da

Ggiesù, na rota ‘e pasta

no piecuro o pullasto

si staje riuno o sazio

che te pò ccumbinà!

N’addora ‘e pummarola

chiena ‘e vasenicòla

‘o stommaco s’arape

quanno ‘a siente ’e passà.

Na lava ‘e muzzarella

nu sciuscio ‘e gravunella

‘sta rota ‘e pasta e ccore

m’ha fatto ‘nnammurà.

Gianna Caiazzo

18 aprile 2mila8