‘A mmiria è comm’â tossa nun se po’ ttrattenè
te trase dint’all’osse si n’ato è meglio ‘e te
te fregne dint’â panza ma nunn’o ddaje a vvedè
-Ma comme, tene cinche e i’ invece tengo tre?
E mo che ce aggia dicere? che mm’avessa ‘nventà?
Cu ’a vocca ll’acqua vino pozzo fà addeventà!
Embè, saje che te dico? Siente ‘sta nuvità:
ajere cacaje strunzo, mm’ascette ‘nu bbabbà!-
Gianna Caiazzo
5 dicembre 2mila7
Napoli, eterna contraddizione.
Sfacciatamente unica, meravigliosamente unica, vergognosamente unica.
Napoli, eterna contraddizione.
Croce e delizia, dolce odio, disperato amore.
Napoli, verità assoluta.
Culla e tomba della mia mente, della mia vita.
Gianna Caiazzo
22 agosto 2mila7
A Napoli, vulite fà ‘a rivoluzione? Levatece ‘o pallone!
Sulo tanno v”e ttruvate ‘mmiezo ‘a strada assatanate.
Nun se joca? ‘O stadio è chiuso? Sta cadenno? ‘O campo è ‘nfuso?
S’arruvinano ‘a jurnata, tutt’ ‘a vita è scumbinata.
Quanno parlano tra amice? Vuje ll’avisseva sentì!
Troppo lento… troppo forte… nunn ha visto proprio ‘a porta!
Operai, dissuccupate, pisciavìnnole e dottori
nun ce sta cchiù differenza: songhe tutte ALLENATORI !!
Gianna Caiazzo
3 giugno 2mila7
Nu juorno cammenanno pe ‘na via
‘e sta Napule scassata e malridotta
m’acchiappaje ‘na tala pucundrìa
chisà pecchè, nemmeno m’arricordo.
ma mo se ben ci penso potè darsi
‘a puzza forte d’’e ssacchette sparze
poco più innanzi sembrava gareggiare
con insistenti olezzi intermittenti e fini
nu giovane cespuglio ‘e sciure ‘e giesummine
ca me pareva ‘e dicere “nun ce sta niente ‘a fà,
‘a puzza ‘e ‘sta munnezza nun se pò sopraffà”
m’amareggiai talmente a questa triste scena
pecchè chillu cespuglio assaje faceva pena
e tra me e me penzaje :
“Chisà si ‘ntiempo veneno a s’’o ppiglià ‘e spazzine
o murarrà asfessiata ‘sta pianta ‘e giesummine?”
Gianna Caiazzo
16 settembre 1985
Dint’a ‘nu vico piccerrillo e scuro
‘ncurniciato ‘e balcune d’ogne ttaglio
me trovo ogne ghiuorno ‘a llà passanno.
Ogne ghiuorno passanno votto ll’uocchio
e nce veco ‘na calma e ‘na cuieta
ma nun m’addono ca stanno areto ê vetre
a tte squadrà d’annanze fino areto.
Gianna Caiazzo
settembre 1985